的确，成日会听到有人话饮牛奶会饮坏肚，一饮就泻。医生就话，一饮牛奶就泻嘅人，係有「乳糖不耐症」，意即小肠内能分解乳糖嘅酵素含有量较少，而呢类人士唔係唔饮得牛奶，只係需要多少少步骤。
饮牛奶唔饮坏肚嘅方法有2种，一係逐啖逐啖咁慢慢饮，一係将牛奶温热后再饮。
但将牛奶整热，又会唔会令营养流失？医生指出，维他命C一经加热就会流失，但牛奶中所含嘅维他命C本来就唔多，其他营养成分亦唔会因加热而流失，所以可以放心加热饮用。另一方面，亦有料理係使用牛奶製作嘅，例如奶油炖菜咁，唔习惯饮牛奶嘅人，都可以透过食呢啲料理吸收牛奶嘅营养。
牛奶加热后，表面嗰层「皮」又係啲咩嚟嘅呢？
原来呢层「皮」，係蛋白质嚟嘅！唔知大家有冇好似嘉宾，大冢宁宁咁整走层「皮」先饮呢？如果之前係会整走嘅，记得以后唔好喇！医生话饮埋佢，唔好浪费呢层营养。
童年时实有被长辈叫饮多啲牛奶，因为饮多啲有机会长高。医生就话，呢个唔係谣传，係实话嚟！
牛奶含有丰富钙质同蛋白质，可增进肌肉同骨骼发展。尤其睡前饮一杯，功效更为显着。
睡眠时，生长荷尔蒙嘅活动最为活跃，能够更好地提升钙质同蛋白质嘅吸收率，令肌肉同骨骼变得壮大，令身体长高。
医生话，饮牛奶会致肥呢个传闻，并唔係真嘅。一杯约200ml嘅牛奶，脂肪含有量为138kcal，而呢一个数值，喺成年人一日需要吸收嘅卡路里中，只佔约7%。因此，每日饮一杯牛奶，并唔会係致肥嘅主因。
而且，牛奶中含有称为「乳铁蛋白」嘅成分，能够将牛奶中嘅脂肪减低，所以饮牛奶其实不易肥。
节目组进行街访时，有受访者表示听闻过饮酒前，先饮牛奶可以「千杯不醉」，但医生就话其实呢个说法，并没有医学根据。
虽然饮完牛奶之后，奶会喺胃内形成一层薄膜保护胃脏，但因为酒精嘅成分粒子幼细，仍是会被吸收嘅，所以饮完牛奶再饮酒，可以「千杯不醉」只係传闻，而非事实。
之但係！医生话酒精同牛奶一齐饮用嘅话，係会有一个神奇嘅作用！
呢个作用就係解酒喇！
牛奶嘅蛋白质可以提升肝机能嘅运作，令肝脏加快进行新陈代谢，可以令酒后人士加快酒醒时间，防止宿醉。
众所周知，牛奶含有丰富钙质，唔单止可以促进肌肉同筋骨健康发展，更加可以保持脑部年轻健康，对预防老人癡呆甚有功效。
而医生指，虽然唔少食材都含有钙质，但重要嘅係钙质嘅「吸收率」，吸收率不足嘅话，食咗都冇多大好处。
研究显示，牛奶所含嘅钙质吸收率，比小鱼同蔬菜都仲要高！呢个作用，係源自只有奶类製品先有嘅「酪蛋白」成分，身体将呢样成分消化后，会令钙质成为溶解状态，更易被身体吸收。
咁咩时间饮最能提升吸收率呢？
据医生所讲，餐前饮牛奶最能够提升吸收率，当胃部处于空腹嘅酸性状态，牛奶中嘅钙质落到胃部后，就会变为钙离子，身体更加容易吸收。而餐后饮都唔係话唔得嘅，只係餐前饮能吸收到嘅钙质更为丰富。
牛奶含有增强肌肉嘅9种胺基酸，能够将蛋白质分解并形成肌肉，而呢9种胺基酸係只能从食物中吸收，人体自身係无法製造出的。
如果只靠饮牛奶摄取足够嘅胺基酸，一日饮3杯就可。但唔係个个都咁锺意饮嘅！医生就话配合营养均衡，含有其他各种胺基酸嘅食物，一日饮一杯牛奶已经非常足够。
据医生所讲，蛋白质同糖质同时摄取，係最有利于增强肌肉嘅饮法，所以推荐香蕉＋牛奶咁饮。
因为做运动时，先消耗糖质，当糖质已经消耗完，就会开始消耗蛋白质，为咗防止蛋白质流失，就建议同糖质一同摄取。
唔锺意食香蕉？咁就可以试下喺牛奶里面加黄豆粉同蜂蜜，同样有呢个作用之余，嘉宾都大讚好好饮！
中暑係因为水份同矿物质嘅流失，而牛奶亦含有丰富矿物成分，医生于是认为比水更具消暑成分。
